Məişət zorakılığı üzrə müraciətlərin sayı.

Təqdim etdiyimiz açıq məlumat dəsti dövlət qurumları, tədqiqatçılar və vətəndaş cəmiyyəti təşkilatları üçün məişət zorakılığı ilə mübarizədə daha əsaslandırılmış qərarların qəbuluna dəstək verir. Məlumatlar əsasında ilkin və təkrar müraciətlərin dinamik müqayisəsi aparılaraq təkrar müraciətlərin daha çox qeydə alındığı regionlar müəyyən edilə bilər. Bu yanaşma mövcud müdaxilə və dəstək mexanizmlərinin effektivliyini qiymətləndirməyə, eləcə də onların hansı hallarda kifayət etmədiyini müəyyən etməyə imkan yaradır. Eyni zamanda, məişət zorakılığının fiziki, psixoloji, iqtisadi və digər növləri üzrə müraciətlər zaman üzrə təhlil edilərək ayrı-ayrı zorakılıq növlərinin dəyişmə meyilləri müəyyənləşdirilə bilər. Əldə olunan nəticələr dövlət qurumlarının daha hədəfli sosial siyasət və preventiv tədbirlər hazırlamasına, vətəndaş cəmiyyəti təşkilatlarının isə maarifləndirmə fəaliyyətini daha düzgün istiqamətləndirməsinə kömək edir. Məlumat dəsti tədqiqatçılar üçün də əhəmiyyətlidir, çünki statistikaya yalnız hüquqi icraata keçmiş hallar deyil, Dövlət Komitəsinə daxil olan, lakin hüquqi prosedura çevrilməyən müraciətlər də daxildir. Bu isə məişət zorakılığının real miqyasını daha obyektiv qiymətləndirməyə imkan verir.

İnnovativ tərəf:

Açıq məlumat dəsti hüquqi icraata düşməyən müraciətləri də əhatə etməsi ilə fərqlənir. Bu xüsusiyyət rəsmi statistikada əks olunmayan halların da nəzərə alınmasına, yəni "görünməyən statistikanın" müəyyən edilməsinə imkan yaradır və məişət zorakılığının real vəziyyətini daha dolğun şəkildə əks etdirir. Nəticədə dəstək xidmətlərinin planlaşdırılması, resursların daha səmərəli bölüşdürülməsi və risk qruplarının erkən müəyyənləşdirilməsi üçün əlavə imkanlar formalaşır.